Wednesday, 17 January 2007

انفلونزا الطيور فى عمارتنا

الموضوع الاول راح فى الوبا


كلاكيت تانى مرة


الموضوع الاول راح فى الوبا


كلاكيت تانى مرة


انفلونزا الطيور فى عمارتنا





جرس الباب بيرن


بيقول تررن تررن


:إبن الجيران


الحقوا يا جماعة انفلونزا الطيور فى العمارة


احنا لقينا فرخة ادام باب جارتنا اللى تحت عمالة تفرفر وشكلها مريب


وياريت تخدوا رقم التليفون ده وتتصلوا بالجهة المسئولة والمختصة بمواجهة انفلونزا الطيور


عشان يبعتوا حد ييجى يشيل الفرخة وياخدوا عينات وحركات


اتخنقت اوى وقلت بينى وبين نفسى ما يتصل هو


وبعدين حاجة غريبة سايبين كل الشقق وبيخبطوا علينامع ان الفرخة مش ادام شقتنا


والعمارة مليانة شباب ورجالة بشنبات


وكمان ما قالش اذا كانت الفرخة بلدى ولا بدارة


تليفونات





بدأنا نتصل برقم الجهة المسئولة عن مكافحة المرض ده فى مصر


وده اللى الرقم اللى ابن الجيران برده اداهولنا


اتصلنا بالرقم طلع مشغووووول مشغووووووول يا ولدى


زى ما يكون ديك البرابر هجم على مصر


والناس كلها بتتصل


قلنا مفيش غير البوليس هو اللى هينقذنا


"وعلى رأى المثل" الشرطة فى خدمة الشعب


بس برده كان الرقم مشغوووووول مشغووووول مشغووووول
وفجأة رد واحد علينا من البوليس وقلناله يا فندم لقينا فرخة وحكيناله الحكاية


قال لنا بسيطة يا جماعة خدوا الرقم ده واتصلوا بالجهة المختصة


تااااااااااااااااااااانى


طب ده احنا ما صدقنا حد يرد علينا
اتصلنا تانى بالجهة المسئولة برده ما زال الرقم مشغوووووول


وفجأة العمارة كلها بترقص وناس بتزغرط وبتهيص


انا افتكرت الفرخة اتكلمت


اتاريهم لقوا رقم جديد نتصل بىىىىىى


وشقتنا بقت مفتوحة للجميع وعيال الجيران يلعبوا ويتنططوا


العيد فرحة بقى واحنا عمالين نتصل


لغاية ما ردت علينا ست طيبة وبنت حلال


ايوة يا فندم لقينا فرخة وحكينا الحكاية
قالت لنا بسيطة خالص ما تقلقوش


اتفضلوا ده رقم الجهة المسئولة عن مكافحة انفلونزا الطيور


هى دى مصر يا عبلة





بعد كمية الإتصالات اللى حصلت


لقسم البوليس


و139 نجدة جمهورية ومفيش فايدة


قررنا نشمر ونفضل ورا رقم الجهة المسئولة عن مكافحة


مرض انفلونزا الطيور لغاية ما يردوا


اخيراااااااااااااا ردواااااااااا
الو الو ايوة يا فندممممممممم
احنا لقينا فى العمارة فرخة
الراجل:ما قلنالكم بلاش تربوا فراخ
لا يا فندم اصل الحكاية
الراجل: شيلوا قفص الفراخ اللى فوق السطح
يا فندم ما حدش فى العمارة مربى فراخ
لقينا فرخة شكلها غريب فرفرت وماتت والكل خايف يقرب قلنا مفيش غيركم
وانا بصراحة ما كنتش مقتنع بالجهة المسئولة والكلام ده
وقلت دول ناس اى كلام وكلهم ناس فى الحمام
بس الراجل ده اثتبلى غير كده
ولا تقوللى 911 ولا 139 جمهورية
الراجل ده طلع متخصص جداً جداً جداً


متخصص أًباً عن جداً جداً جداً
قال لنا اتبعوا الخطوات اللى هقول عليها وتنفذوها بالحرف الواحد
كلننا ودان صاغية
لازم حد فيكم يلبس جوانتى ويشيل الفرخة يدفنها فى اى مكان
ومش كده وبس
ترشوا مكانها فنيك
كان نفسى احضن التليفون وابوسه على كل خطوة وجهنا فيها
على كل همسة من همساته هذا الرجل المتخصص العبقرى

وتبرع ابويا وشالها ودفنها
وبرده رشينا فنيك
دى خطوات مدروسة بعناية يا جماعة ولازم نطبقها

10 comments:

esraa said...

أنا أول تعليق (:
فعلا هي دي مصر ياعبله, وبعدين يعني انت لازم تشكر الراجل برضو , مش كان ممكن باباك يشيلها من غير جوانتي وده يعرض حياته وحياتكم للخطر؟ أو كان ممكن تغسلو مكانها بأي حاجه غير الفنيك وده برضو يعرضكم للخطر؟
لكن الشئ الملفت للنظر هو رقم البوليس اللي كان مشغول, طب افرض ان في حرامي أو قاتل في الشقه وانت بتتصل بالبوليس , هتقوله ايه استني ربنا يخليك ماتسرقناش أصل البوليس مشغول؟

shabfa2re said...

esraa
اشكره ايه ده انا كنت هشرحوا
اما عن البوليس المشغول
فحتى لو ردوا علينا
هييجوا يقبضوا على اى حد
ويقولوا هو ده الحرامى
او مختل عقليا
وكله تمام يا فندم
ده اذا جم؟

www.blogs4arab.com said...

نرجو تشريفنا
www.blogs4arab.com

الأباصيرى said...

هى دى مصر يامحمود

نيل وخضرة وجو جميل وأرشادات مهمة

shabfa2re said...

الاباصيرى
لا وراجل رايق اوىىىىىىىى
وواثق من نفسه
المسئولين فى مصر بيتعبوا اوى

koukawy said...

هاهاهاهااهاهاهاهها
هما بتوع مكافحه و لا بتوع تعليم عبر الأسلاك كيف تكافح
هي دي مصر
بس الغريبه انك لسه مقتنع لغاية دلوقتي ان الشرطه في خدمة الشعب

shabfa2re said...

koukawy
لا ما خلاص ما بقتش مقتنع بأى حاجة
ولا شرطة ولا اسعاف ولا مطافى
دى اشاعات ان الخدمات دى موجودة فى بلدنا

عمرو said...

انفلونزا الطيور موضوع مهم

عمرو said...

انفلونزا الطيور موضوع مهم

عمرو said...

لو عارف حد بيكتب على الرياضه