Monday 9 March 2009

ATM


مبروك يا عوضين
مبروك يا محمدين
الايه تى إم هيدخل الشركة
انتشار الزغاريط والفرح والمرح والهرج والقنابل الفوسفورية فرحا
بالفكرة اللولبية لمدير شركتنا ..شركة المهلبية
وقال لها صريحة مريحة فسيحة
مدير الحسابات اللى مش وراه حاجة غير قراية الجرايد عشان كده بحس انى داخل عند الحلاق
انطلق شرارة الرحمة من فمه ذو الرائحة الكريهة
وقال : يا جماعة من الشهر الجاى كل الشركة مش هتقبض كاش
كلكم هتقبضوا عن طريق الإيه تى إم
ذلك الجهاز العظيم ..اللى تدخل فيه الكارت وهو يكُع
وما تعدش وراه عشان ما بيحبش اللى يخوّنه
مليت الابليكاشان وقبل نهاية الشهر بيوم قالولنا لازم تروحوا البنك وتستلمو الكارت بتاع الايه تى إم
طب نروح امتى وفين وازاى يا كابتن...تستأذن ساعة م الشغل وتروح وتيجى بسرعة
لان البنك هيقفل بعد الساعة 2 موضوع استلام كروت الإيه تى إم
والعنوان اهو.. جنب مؤمن اللى فى ميدان تريموف
طب انا اعرف تريموف لما هعرف مؤمن اللى فيه
اتجهت الى العنوان الهولامى المكتوب
وفضلت ماشى ماشى ماشى ولا بيدى
ووقف ادام مؤمن وسألت راجل مفتخر كده وقلتله هما قالولى البنك هنا جنب مؤمن قاللى تمشى كده على طول وهتلاقيه على شمالك
مشيت مشيت مشيت
لغاية ما لمحت البنك الحزنفلى الجامد اوى ولاول مرة هدخل بنك فى تاريخى المعاصر
دخلت البنك ..بتاع الامن قاللى جاى ليه ..قلتله عشان استلم الكارت
قام مدينى ورقة ..قلتله اروح بيها فين دى ..قاللى اتفضل استريح واستنى دورك
وفضلت قاعد وحاسس انى فى عيادة ومستنى حد ينده على اسمى ..وما حدش بينده
والناس اللى حواليا عمالين يدخلوا واحد ورا التانى وبعدين اكتشفت ان فى لوحة ادامى اول ما اشوف فيها رقمى اقوم اقتحم المكتب ع البُنية
المهم جه رقمى ودخلت وقعدت وطلبت الكارت بتاعى
قالتلى بطاقتك..قلتلها تفضلى
قالتلى اسمك ايه..قلتلها ما هو مكتوب فى البطاقة ومع ذلك نقولو تانى
وبعدين فتحت الدرج وطلعت كرررروت كتيرة وفضلت تدوّر فيها وما لقتش الكارت بتاعى
فضلنا ع الحال ده بتاع ساعة الا ربع بالاضافة الى نص ساعة كنت منتظر دورى فيها
وانا عمال اتخانق معاها واقول لها انا اصلا مخنوق من حوار القبض بالكارت لانى ما بحبش شغل البنوك ووجع القلب ده
مش عارف الاقيها م الشركة ولا من البنك ولا منين
وهى عمالة تقوللى طب يا فندم اهدى بس ..انت عملت الكارت بتاعك امتى
بلا اهدى بلا بتاع بقى ..ثروتى كلها هتروح بسببكو
وعدا مدير البُنية وقاللى ايه الحكاية
واتلمو كبارات البنك وعملو قعدة عرب وكل واحد بيرمى الاستهتار ع التانى
واعتذار شديد اللهجة وشرفنا بكرة وكل شيء هيبقى تمام
وخرجت برة البنك بعد ما قضيت يوم لذيذ وحسيت ان الظلام الدامس يقترب
والبنك كله شايلنى وبيوصلونى لغاية الباب وهو فرع صغير اصلا الفه فى خطوتين
اول ما خرجت من باب البنك لقيت فى وشه بالظبط بنك جنرال سوسيتيه وهو المطلوب اثباته
انى دخلت بنك السى آى بى والكارت بتاعى تبع بنك جنرال سوسيتيه والفرق بين ال2 خطوات معدودة
وبالتالى مقدرتش اقرّب من فتح باب البنك المطلوب عشان اصحاب البنك الاولانى شايفنى وهيعلقونى
وعشان كمان الساعة عدت 2
ورجعت تانى يوم واستلمت الكارت

10 comments:

maha zein said...

علي فكرة
عداك العيب

لا بجد

بقه يا راجل مكلف نفسك وجاي تقولي بوست حلو

بس تعليق حلو والله
لانه بيقول اللى في نفسك دون تكليف ولا تأليف ولا تمثيل

انا مسمحاك
ويا ريت تسامحني


كل سنة وانت بصحة وسلامة

اللهم صلى وسلم وبارك على سيدنا محمد وعلى اله وصحبه اجمعين

الحمد الله انك فكرتني بمدونتك
لاني كنت بموت في المدونة دي جدا
بس توهت عنها من فترة

الاهم خدت حقك ولا لا من العالم الغجر دول بتوع البنوك
هه
بقه داخلي السي اي بي
اوعه يكون الكارت بتاعك من بنك التسليف
ولا الائتمان الزراعي
اوعه
ازعل

shabfa2re said...

مها زين الدين زيدان
والله رد من قلبى على فكرة
منورانى
اخدت حقى واخدت الكارت وقبضت المرتب
طويل - ابيض - مرح - اشارك فى الاثاث

Asmaa said...

اهم حاجة انك قبضت في الاخر :D

دهاء سياسي said...


السلام عليكم و رحمة الله و بركاته

متابعه القصه و شادانى م الاول بس لم اتخيل النهايه دى خالص :D :D :D

بتحصل فى احسن العائلات .. اعرف واحده صاحبتنا عملت عمله مشابهه لدى فى محلات النساجون الشرقييون و بهدلتهم آخر بهدله و طلعت المشكلة عندها فى الاخر :D :D :D

بس عندى سؤال بجد فعلا : هل المكنه الجديدة دى حتفرق فى حاجه معاكو .. يعنى هل حتوفر عليكو عناء القبض مثلا ولا حيبقى نفس الموقف برضه ؟؟
دمت بكل خير :)

شخـا بيــط مـحـجـوب said...

ههههههههههههههه
ههههههههههههههه

شكلك غاوى مشاكل
بس المهم تعدى على خير
وئعت الدنيا فى بعضهم ومشيت
بس غريبة هما مش سئلوك تبع اى شركة حضرتك وهل شركتة متعاملة معاهم

ولا اى حد يدخل يقول لهم الكرت بتاعى وخلاص
بس كويس انهم معملوش كرت ليك فى سعتها وحولولك مرتبك عليهم كانت مشكلة

تحياتى ليك

شخابيط mahgoub

Unknown said...

هع هع هع هعععععععععععععععع
حلوة دى

shabfa2re said...

jousian
الحمدلله بس بعد معاناة
بكره انا البنوك دى

shabfa2re said...

دهاء سياسى
عندما يكون القبض من المكنة اجبارى
تعرفى على طول ان فى عقد بين الشركة والبنك
يعنى الشركة والبنك مستفيدين
واحنا لايصين
لان المكنة بتخصم حوالى 90 جنيه كل 3 شهور
و50 جنيه فى اول قبض
ومش عارف سنويا
كام
مش عارف ايه اللى استفدناه بقى

shabfa2re said...

شخابيط محجوب
لا ما هما سألونى انت تبع شركة ايه
وقالتلى انا اول مرة اسمع بالشركة دى فى بنكنا
قلتلها ازاى ده اصحابى استلموا الكارت النهاردة من عندكم
ما ينفعش يعملولى كارت ويحولولى مرتبى عليها لان الشركة مش بتتعامل معاه
نورتنى يا جميل

shabfa2re said...

enjy
هع هع هع
نورتينى :D