Monday 29 September 2008

حرامى

عند جامع رابعة العدوية فى مدينة نصر
وفى نهار رمضان
اخر زبون نزل من ميكروباص بيركن.. والسواق بيتخانق معاه بصوت عالى مسمّع الشارع كله
وبعدين لقيت الشاب ده بعد ما نزل م الميكروباص بيجرى بسرعة اوى
وست بتقول موبايلى اتسرق الحقونى
لقيت مدينة نصر كلها بتجرى ورا الواد
من بوابة جامع الرابعة الى البوابة التانية
وبيقولوا حرامــــــــــــــــــــــــــــــــــــــــــــــــــى
وكنت مخنوق اوى ان حتى فى نهار رمضان فى حرامية
واول مرة اشوف حرامى بقى
قلت لما اتفرج ايه اللى هيحصل
لقيتهم راجعين بالحرامى منتصرين
اتنين ماسكينه من حزامه واتنين ماسكينه من قفاه
امتى هنخلص منكو ومن اشكالكو..حتى فى رمضان مش عاتقين
وبعدين زى الافلام كده
تلاتة كتفوه
وواحد ايده اكبر من رجله عمال يديله بوكسات فى وشه وبطنه
والواد حليوة ومربرب كده ومش متأثر بالضرب وكل همه انه يدخل القيمص جوا البنطلون
ومشيت وراهم عشان اكمل فرجة طلعو ادام البوابة
اهو يا ست مسكنالك الحرامى بس مش لاقيين معاه الموبايل
مش هو ده يا حاجّة اللى اخد منك الموبايل؟
الست : انا ما اظلمش حد ..بس انا مش لاقية الموبايل وكان لسه معايا
!نعم؟
قامو سألو سواق الميكروباص اللى نزل منه.. امال كان بتتخانق معاه ليه يا اسطى
! السواق: عشان البيه ادانى النص جنيه ده
بذمتكو النص جنيه ده يمشى؟
وانت يا ابنى كنت بتجرى ليه واحنا بنجرى وراك
الشاب وهو بيدخل القميص جوا البنطلون : انا كنت بجرى عشان اتأخرت على شغلى يا جدعان
وفى لحظة ...اختفى الجمع المهول فى لحظة واتبقى راجل محترم ماسك سبحة من اللى كانو بيلطشوه فى الزحمة قال له: معلش يا ابنى احنا
معذورين و افتكرناك حرامى
ويكفينا اجر النية..سلامو عليكو

17 comments:

Superman said...

و ياتري ادي نص جنيه تاني للسواق؟

Unknown said...

لأ بجد؟

هي صحيح النيه الحسنه بناخد عليها ثواب
بس مش لدرجة اننا نضرب واحد ونعطله عن شغله كمان

shabfa2re said...

superman
ما هو ما كانش اخده يا زكى
:P

shabfa2re said...

esraa
بصراحة يا اسراء الواد شكله ما يديش غير حرامى

maha zein said...

هو ايه الغلب ده
يعني لخبطولوا البنطلون والقميص
حسبي الله ونعم الوكيل
وانت يا جدع كنت فين وهما بيلطشوا
مش كنت لشطتلك حبة
شكلك كده ملكش فى الاكشن

shabfa2re said...

maha zein
الاكشن ماليش فيه
:D
بس زى ما قلت الواد شكله يدى على حرامى

Ahmed EL Masry said...

مجموعة من الدهماء زى ماوصفهم احمد خالد توفيق .. ناس بتجرى وبعدين تفكر وتفهم في ايه !

نعكشة said...

:D
مسخرة

كل سنة و حضرتك طيب

Mkjwe said...

ثم ماتت رابعه
نايس بوست
وكل سنة وانت طيب
تحياتي واحترماتي

Nourhan Sirag said...

بجد مش متخليله ان ده ممكن يحصل

ومش متخيله ان فيه بشر بكم الغباء ده!!

leeno said...

يا لهووووووووووووووووووووي !!!!!!!

Iskanderani said...

يبقي كدة ، إنت في مصر المحروسة سابقاً والموكوسة بالاشكال دي حاليًيا .... ثواب ؟ النية؟؟؟ ليه؟ سلم لي علي كل عبيط وأهبل ماسك في إيده سبحة ومنتظر الاجر والثواب من السبحة. تعرف إن عبدة الاصنام عندهم المزيد من العقل؟؟؟؟

تحيات إسكندراني في بلاد الله الواسعة

طهقان said...

فقري صحيح
بس احنا سيبك انت
شعب خدوووووم قوي

وشهم لابعد الحدود

والله يا سفاح يا ابني
هم يضحك وهم يبكي

Z_Diva said...

loooooooooooooooooooooooooooooooool

hya de masr ya fa2ry :D

Banota Tota said...

والله معرفه اضحك ولا اواسي الشاب ده
لاء وايه وصفات الجدعنه المتاصله وخده حقها اوي مع الشعب المصري بجد هم يبكي وهم يضحك وكمان صفه الجدعنه الحاجه الحلوه وخدنها عمياني ..من الاخر الشعب المصري مدبببببببببب

احمد سعيد said...

فقرى

Anonymous said...

صباح الخير استاذ فقرى

انا اسراء نوح مذيعة فى راديو المحروسة.نت كنت بعمل برنامج لرمضان اسمه ورقة وقلم بنعرض فى كل حلقة ورقة من مذكرات انسان عادى وعجبتنى بعض كتاباتك وخصوصا (حرامى) وكنت بستأذنك انى اذيع بعض الكتابات باسمك

هل ممكن ترد عليا بسرعة

ايميلى
asas-raah-111@hotmail.com