Revolution

ATM

مبروك يا عوضين
مبروك يا محمدين
الايه تى إم هيدخل الشركة
انتشار الزغاريط والفرح والمرح والهرج والقنابل الفوسفورية فرحا
بالفكرة اللولبية لمدير شركتنا ..شركة المهلبية
وقال لها صريحة مريحة فسيحة
مدير الحسابات اللى مش وراه حاجة غير قراية الجرايد عشان كده بحس انى داخل عند الحلاق
انطلق شرارة الرحمة من فمه ذو الرائحة الكريهة
وقال : يا جماعة من الشهر الجاى كل الشركة مش هتقبض كاش
كلكم هتقبضوا عن طريق الإيه تى إم
ذلك الجهاز العظيم ..اللى تدخل فيه الكارت وهو يكُع
وما تعدش وراه عشان ما بيحبش اللى يخوّنه
مليت الابليكاشان وقبل نهاية الشهر بيوم قالولنا لازم تروحوا البنك وتستلمو الكارت بتاع الايه تى إم
طب نروح امتى وفين وازاى يا كابتن...تستأذن ساعة م الشغل وتروح وتيجى بسرعة
لان البنك هيقفل بعد الساعة 2 موضوع استلام كروت الإيه تى إم
والعنوان اهو.. جنب مؤمن اللى فى ميدان تريموف
طب انا اعرف تريموف لما هعرف مؤمن اللى فيه
اتجهت الى العنوان الهولامى المكتوب
وفضلت ماشى ماشى ماشى ولا بيدى
ووقف ادام مؤمن وسألت راجل مفتخر كده وقلتله هما قالولى البنك هنا جنب مؤمن قاللى تمشى كده على طول وهتلاقيه على شمالك
مشيت مشيت مشيت
لغاية ما لمحت البنك الحزنفلى الجامد اوى ولاول مرة هدخل بنك فى تاريخى المعاصر
دخلت البنك ..بتاع الامن قاللى جاى ليه ..قلتله عشان استلم الكارت
قام مدينى ورقة ..قلتله اروح بيها فين دى ..قاللى اتفضل استريح واستنى دورك
وفضلت قاعد وحاسس انى فى عيادة ومستنى حد ينده على اسمى ..وما حدش بينده
والناس اللى حواليا عمالين يدخلوا واحد ورا التانى وبعدين اكتشفت ان فى لوحة ادامى اول ما اشوف فيها رقمى اقوم اقتحم المكتب ع البُنية
المهم جه رقمى ودخلت وقعدت وطلبت الكارت بتاعى
قالتلى بطاقتك..قلتلها تفضلى
قالتلى اسمك ايه..قلتلها ما هو مكتوب فى البطاقة ومع ذلك نقولو تانى
وبعدين فتحت الدرج وطلعت كرررروت كتيرة وفضلت تدوّر فيها وما لقتش الكارت بتاعى
فضلنا ع الحال ده بتاع ساعة الا ربع بالاضافة الى نص ساعة كنت منتظر دورى فيها
وانا عمال اتخانق معاها واقول لها انا اصلا مخنوق من حوار القبض بالكارت لانى ما بحبش شغل البنوك ووجع القلب ده
مش عارف الاقيها م الشركة ولا من البنك ولا منين
وهى عمالة تقوللى طب يا فندم اهدى بس ..انت عملت الكارت بتاعك امتى
بلا اهدى بلا بتاع بقى ..ثروتى كلها هتروح بسببكو
وعدا مدير البُنية وقاللى ايه الحكاية
واتلمو كبارات البنك وعملو قعدة عرب وكل واحد بيرمى الاستهتار ع التانى
واعتذار شديد اللهجة وشرفنا بكرة وكل شيء هيبقى تمام
وخرجت برة البنك بعد ما قضيت يوم لذيذ وحسيت ان الظلام الدامس يقترب
والبنك كله شايلنى وبيوصلونى لغاية الباب وهو فرع صغير اصلا الفه فى خطوتين
اول ما خرجت من باب البنك لقيت فى وشه بالظبط بنك جنرال سوسيتيه وهو المطلوب اثباته
انى دخلت بنك السى آى بى والكارت بتاعى تبع بنك جنرال سوسيتيه والفرق بين ال2 خطوات معدودة
وبالتالى مقدرتش اقرّب من فتح باب البنك المطلوب عشان اصحاب البنك الاولانى شايفنى وهيعلقونى
وعشان كمان الساعة عدت 2
ورجعت تانى يوم واستلمت الكارت

صيام عاشوراء

متأخرة شوية بس لظيظة
كاميرتى لما تشتغل بقى
افعص ع الصورة للتكبير

هابى عيد - نكت لظيظة

واحد صعيدى ماشى فى الشارع لقى كنز ...قالك كويس ناقص الخريطة بقى

حيوان جديد جداً؟ القنفد عشان لسه بشوكه

طيارة خبطت فى عمارة يبقى الاتنين ايه؟ اجازة الحلاقين

الحيوان اللى على طول مشغول - الخرتيت تيت تيت تييت

واحدفاتح محل سمك ابنه مات فقال : كان لسة صاحى وبيلعب

مرة واحد كل لما يعدى من شارع يشوف واحد بيشرب سيجارتين
فسأله : ليه كل لما اعدى من هنا اشوفك بتشرب سيجارتين؟
قال له: اصل انا كان ليه واحد صاحبى متعودين نشرب سجاير هنا وصاحبى ده سافر فأنا بشربلى وبشربله
بعدها بفترة صاحبنا ده عدا شافه بيشرب سجارة واحده فقاله انت بتشرب سيجارة واحده ليه؟
قال له: اصل انا بطلت سجاير

التلميذ : بحبك يا أبله و عاوز أتجوزك
المدرسه: بس أنا مبحبش الأولاد الصغيرين
التلميذ: وأنا مش مستعجل على الأولاد

مرة واحد غبي ضاعت محفظته راح القسم عمل محضر الظابط بيقولوا ماتقلقش يابلدينا هنجبهالك من تحت الأرض
وبعد ما خرج من القسم شاف الناس بيحفروا للخط بتاع المترو راح قايلهم الهمة يارجالة سودة وبسوستة

الحاجة الحلوة

حرامى

عند جامع رابعة العدوية فى مدينة نصر

وفى نهار رمضان

اخر زبون نزل من ميكروباص بيركن.. والسواق بيتخانق معاه بصوت عالى مسمّع الشارع كله

وبعدين لقيت الشاب ده بعد ما نزل م الميكروباص بيجرى بسرعة اوى

وست بتقول موبايلى اتسرق الحقونى

لقيت مدينة نصر كلها بتجرى ورا الواد

من بوابة جامع الرابعة الى البوابة التانية

وبيقولوا حرامــــــــــــــــــــــــــــــــــــــــــــــــــى

وكنت مخنوق اوى ان حتى فى نهار رمضان فى حرامية

واول مرة اشوف حرامى بقى

قلت لما اتفرج ايه اللى هيحصل

لقيتهم راجعين بالحرامى منتصرين

اتنين ماسكينه من حزامه واتنين ماسكينه من قفاه

امتى هنخلص منكو ومن اشكالكو..حتى فى رمضان مش عاتقين

وبعدين زى الافلام كده

تلاتة كتفوه

وواحد ايده اكبر من رجله عمال يديله بوكسات فى وشه وبطنه
والواد حليوة ومربرب كده ومش متأثر بالضرب وكل همه انه يدخل القيمص جوا البنطلون

ومشيت وراهم عشان اكمل فرجة طلعو ادام البوابة

اهو يا ست مسكنالك الحرامى بس مش لاقيين معاه الموبايل

مش هو ده يا حاجّة اللى اخد منك الموبايل؟

الست : انا ما اظلمش حد ..بس انا مش لاقية الموبايل وكان لسه معايا

!نعم؟

قامو سألو سواق الميكروباص اللى نزل منه.. امال كان بتتخانق معاه ليه يا اسطى

! السواق: عشان البيه ادانى النص جنيه ده

بذمتكو النص جنيه ده يمشى؟

وانت يا ابنى كنت بتجرى ليه واحنا بنجرى وراك

الشاب وهو بيدخل القميص جوا البنطلون : انا كنت بجرى عشان اتأخرت على شغلى يا جدعان

وفى لحظة ...اختفى الجمع المهول فى لحظة واتبقى راجل محترم ماسك سبحة من اللى كانو بيلطشوه فى الزحمة قال له: معلش يا ابنى احنا

معذورين و افتكرناك حرامى

ويكفينا اجر النية..سلامو عليكو

! قال فقرى قال

مجلس الشورى اللى اتحرق حريق هائل على أعلى مستوى واحدث صيحة

بوابته لازقة فى بوابة شغلى الجديد اللى قدمت عليه من اسبوع

A D S L

Telesales

لشركة لينك دوت نت بتاعة ال

ADSL

اجمل وارق واحن واعمق الحوارات التليفونية بينى وبين العملاء العساسيل

الو مساء الخير يا فندم

مساء النور

مع حضرتك شاب فقرى من شركة لينك دوت نت

عاوز ايه يعنى

ADSL بكلم حضرتك بخصوص خدمة ال

اللى هى ايه يعنى

الانترنت يا فندم

ايوة ايوة عرفته

طب بص يا برنس انا دلوقتى عندى مهندس الدش ومشغول معاه اوى

تمام يا فندم

فياريت تتصل بيا بكرة زى دلوقتى عشان نفرشح الفراشيـح

تحت امرك حضرتك يا فندم بكرة زى دلوقتى هكلم حضرتك

تانــــــــــــــــــــــــــــــــــــى يـــــــــــــــــــــوم

مساء الخير يا فندم

عرفتك يا بتاع النت

اهلا بحضرتك يا فندم

قوللى بقى ايه حكاية البتاع ده

الدى اس ال يا فندم يعنى الانتر نت فائق السرعة

حضرتك بتستخدم الانترنت عن طريق الدايل اب ولا الدى اس ال
انا بستخدمه ايوة

ايوة يا فندم يعنى حضرتك مشترك فى خدمة الدى اس ال ولا بتستخدمه عن الدايل اب

اللى هو ايه ده كمان

الدايل اب يا فندم يعنى استخدام الانترنت عن طريق التليفون بأرقام 0777

لا لا عمرى ما استخدمته عن طريق التليفون

يعنى حضرتك مشترك فى خدمة الدى اس ال

لا برضه

طب حضرتك مش بتستخدم الانترنت عن طريق الدايل اب ولا الدى اس ال ..امال حضرتك بتستخدمه عن طريق ايه؟

لا احنا بنستخدمه عن طريق الكمبيوتر

Ta X i

فى ليلة شتاء باردة برد فظييييييييع مريييييييييع سقيييييييييييع

الجو تلللللللللللج

الامطار مشخلعة الشوارع

وانا نويت الشتا ده انى البس لبس خفيف قلت عشان استمتع بالشتا

المهم طبعا بردت اوى وجالى مغص م البرد

والساعة 12 بالليل

قلت لما اركب تاكسى

وان الواحد يلاقى تاكسى فى الزمان ده معجزة

وده كله بسبب الدولار

المهم لقيت تاكسى انتيكة وابن حلال جاى بيتمطّع وبيتدلع

السواق بطـــــــــــــــــــــــــــــــــــــــــــــــــــــــيء

الازاز ما بيتقفلش والجو تـــــــــــــــــــــلج

وفى نص الطريق

لقيت العربية وقفت

لقيت السواق بيقوللى

انا اسف اوى

لا يا حاج ولا يهمك بس انا بصراحة مفيّاش حيل انى ازؤ

لا يا ابنى انا متأسف

طب ننزل نزؤ سوا

لا يا ابنى متأسف معلش

طب نستنى حد ييجى يزؤنا

لا يا ابنى انا آسف

فى ايه يا حاج

يا ابنى العربية مش عطلانة ولا حاجة ده انا اللى وقفت

طب ووقفت ليه؟

ورد عليا الرد المفحم

الرد الامثل

الرد الاعظم

وقال

انا اسف معلش

ممكن تنزل لانى مش هقدر اكمل الطريق لان ميعاد نومى جه

قلتله انا اسف يا حاج

Happy ValantEEn

كل ما احب واحدة ..تقوللى انا بعتبرك زى اخويا

انا داخل فى حسبة 42 اخت لغاية دلوقتى