الحاجة الحلوة

حرامى

عند جامع رابعة العدوية فى مدينة نصر

وفى نهار رمضان

اخر زبون نزل من ميكروباص بيركن.. والسواق بيتخانق معاه بصوت عالى مسمّع الشارع كله

وبعدين لقيت الشاب ده بعد ما نزل م الميكروباص بيجرى بسرعة اوى

وست بتقول موبايلى اتسرق الحقونى

لقيت مدينة نصر كلها بتجرى ورا الواد

من بوابة جامع الرابعة الى البوابة التانية

وبيقولوا حرامــــــــــــــــــــــــــــــــــــــــــــــــــى

وكنت مخنوق اوى ان حتى فى نهار رمضان فى حرامية

واول مرة اشوف حرامى بقى

قلت لما اتفرج ايه اللى هيحصل

لقيتهم راجعين بالحرامى منتصرين

اتنين ماسكينه من حزامه واتنين ماسكينه من قفاه

امتى هنخلص منكو ومن اشكالكو..حتى فى رمضان مش عاتقين

وبعدين زى الافلام كده

تلاتة كتفوه

وواحد ايده اكبر من رجله عمال يديله بوكسات فى وشه وبطنه
والواد حليوة ومربرب كده ومش متأثر بالضرب وكل همه انه يدخل القيمص جوا البنطلون

ومشيت وراهم عشان اكمل فرجة طلعو ادام البوابة

اهو يا ست مسكنالك الحرامى بس مش لاقيين معاه الموبايل

مش هو ده يا حاجّة اللى اخد منك الموبايل؟

الست : انا ما اظلمش حد ..بس انا مش لاقية الموبايل وكان لسه معايا

!نعم؟

قامو سألو سواق الميكروباص اللى نزل منه.. امال كان بتتخانق معاه ليه يا اسطى

! السواق: عشان البيه ادانى النص جنيه ده

بذمتكو النص جنيه ده يمشى؟

وانت يا ابنى كنت بتجرى ليه واحنا بنجرى وراك

الشاب وهو بيدخل القميص جوا البنطلون : انا كنت بجرى عشان اتأخرت على شغلى يا جدعان

وفى لحظة ...اختفى الجمع المهول فى لحظة واتبقى راجل محترم ماسك سبحة من اللى كانو بيلطشوه فى الزحمة قال له: معلش يا ابنى احنا

معذورين و افتكرناك حرامى

ويكفينا اجر النية..سلامو عليكو

! قال فقرى قال

مجلس الشورى اللى اتحرق حريق هائل على أعلى مستوى واحدث صيحة

بوابته لازقة فى بوابة شغلى الجديد اللى قدمت عليه من اسبوع

A D S L

Telesales

لشركة لينك دوت نت بتاعة ال

ADSL

اجمل وارق واحن واعمق الحوارات التليفونية بينى وبين العملاء العساسيل

الو مساء الخير يا فندم

مساء النور

مع حضرتك شاب فقرى من شركة لينك دوت نت

عاوز ايه يعنى

ADSL بكلم حضرتك بخصوص خدمة ال

اللى هى ايه يعنى

الانترنت يا فندم

ايوة ايوة عرفته

طب بص يا برنس انا دلوقتى عندى مهندس الدش ومشغول معاه اوى

تمام يا فندم

فياريت تتصل بيا بكرة زى دلوقتى عشان نفرشح الفراشيـح

تحت امرك حضرتك يا فندم بكرة زى دلوقتى هكلم حضرتك

تانــــــــــــــــــــــــــــــــــــى يـــــــــــــــــــــوم

مساء الخير يا فندم

عرفتك يا بتاع النت

اهلا بحضرتك يا فندم

قوللى بقى ايه حكاية البتاع ده

الدى اس ال يا فندم يعنى الانتر نت فائق السرعة

حضرتك بتستخدم الانترنت عن طريق الدايل اب ولا الدى اس ال
انا بستخدمه ايوة

ايوة يا فندم يعنى حضرتك مشترك فى خدمة الدى اس ال ولا بتستخدمه عن الدايل اب

اللى هو ايه ده كمان

الدايل اب يا فندم يعنى استخدام الانترنت عن طريق التليفون بأرقام 0777

لا لا عمرى ما استخدمته عن طريق التليفون

يعنى حضرتك مشترك فى خدمة الدى اس ال

لا برضه

طب حضرتك مش بتستخدم الانترنت عن طريق الدايل اب ولا الدى اس ال ..امال حضرتك بتستخدمه عن طريق ايه؟

لا احنا بنستخدمه عن طريق الكمبيوتر

Ta X i

فى ليلة شتاء باردة برد فظييييييييع مريييييييييع سقيييييييييييع

الجو تلللللللللللج

الامطار مشخلعة الشوارع

وانا نويت الشتا ده انى البس لبس خفيف قلت عشان استمتع بالشتا

المهم طبعا بردت اوى وجالى مغص م البرد

والساعة 12 بالليل

قلت لما اركب تاكسى

وان الواحد يلاقى تاكسى فى الزمان ده معجزة

وده كله بسبب الدولار

المهم لقيت تاكسى انتيكة وابن حلال جاى بيتمطّع وبيتدلع

السواق بطـــــــــــــــــــــــــــــــــــــــــــــــــــــــيء

الازاز ما بيتقفلش والجو تـــــــــــــــــــــلج

وفى نص الطريق

لقيت العربية وقفت

لقيت السواق بيقوللى

انا اسف اوى

لا يا حاج ولا يهمك بس انا بصراحة مفيّاش حيل انى ازؤ

لا يا ابنى انا متأسف

طب ننزل نزؤ سوا

لا يا ابنى متأسف معلش

طب نستنى حد ييجى يزؤنا

لا يا ابنى انا آسف

فى ايه يا حاج

يا ابنى العربية مش عطلانة ولا حاجة ده انا اللى وقفت

طب ووقفت ليه؟

ورد عليا الرد المفحم

الرد الامثل

الرد الاعظم

وقال

انا اسف معلش

ممكن تنزل لانى مش هقدر اكمل الطريق لان ميعاد نومى جه

قلتله انا اسف يا حاج

Happy ValantEEn

كل ما احب واحدة ..تقوللى انا بعتبرك زى اخويا

انا داخل فى حسبة 42 اخت لغاية دلوقتى

هابى نيو يييييييييييييييه

كل سنة وانتم طيبين

واتمنى ..انى زى ما شوفتكم سعداء فى 2007
اتمنى فى 2008 انى اشوفكم.........










لانى ما شوفتش اى حد فيكم
:D :D :D :D :D :D

فى المحكمة

الاغنية الذى انتظرها الجميع

الاغنية التى انتشرت فى كل الميكروباصات وخاصة المفتخرة منها والمزودة بكاسيت و
Equalizer

الاغنية التى تم تصويرها على طريقة الفيديو كليب

الاغنية التى تكلف تصويرها 4 مليون دولار بسبب زحمة المحاكم- موسم بقى وكل سنة وانتم طيبين

الاغنية التى فازت بجائزة الكلب الفضى فى مهرجان صفط اللبن

الاغنية التى انتزعت الآهات ونكدت ع الجميـع

الاغنية التى كانت سبب فى انطلاق سوبر ستار العرب (سيـد الشيـخ)

الاغنية التى ثار حولها الجدال بين محمد فؤاد وعمرو دياب ولطشها ابو السيـد

الاغنية التى دعمتها بكل جوارحى حتى وصلت الى العالمية

الاغنية التى جمعت بين كل الوان الغناء ...الشعبى
الدراما
الاكشن
الرومانسية
الموال
الفانتازيا وحرب الكواكب

اغنية العظة والموعظة ..اغنية الحساب والعقاب..

وختاماً
الجريمة لا تفيد

فى المحكمة

انها سليمة

كل سنة وانتو طيبين يا ماى لافلى انت وهو وهى

تاجـتاج

لو قالولك اختار عصر من عصور مصر علشان تعيش فيه ...تختار اى عصر و فى عهد اى حاكم ؟؟ اشمعنى العصر

ده؟؟
سؤال لظيظ ..انا بحب ناصر اوى بس هختار عصر السادات عشان كان نفسى اوى احارب

اول اولويه فى حياتك...عيلتك ...شغلك و لا اصحابك؟؟؟
عيلتى واصحابى ومش هختار حياتى لان هما حياتى..يا مثبتهم
:D

ايه اكتر حاجه بتحبها فى رمضان؟
القطايف :D

اوصف ليا اجمل فطار ممكن تفطره؟
فول بالزيت الحار وطعمية كبيرة وملعلطة

لو انت حاكم على مجموعه من الافراد هتكون عادل؟؟؟ طب هتعمل ايه علشان تتاكد انك حاكم عادل؟؟؟
ان شاء الله هكون عادل...دايما هحط نفسى مكان كل حد وانا بحكم عليه

اللى بيبوظ الحكام ...نفسهم و لا الشعب و لا الحاشيه المقربه؟؟؟
نفسهم والشلة المقربة

مين اكتر اعلامى مصرى بتحترمه؟؟؟
وائل الابراشى

قريت ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه؟؟لو اه ايه رايك فيه؟؟ ما قرأتوش

لو ممكن تشتغل شغلانه تانيه غير اللى انت بتشتغلها او هتشتغلها كنت تتمنى تبقى ايه؟؟؟
بعشق شغل الصحافة والاعلام ..ونفسى اكون صحفى واعلامى ..ومونتير

تانى بلد تتمنى تعيش فيه بعد مصر ايه؟؟؟
مقدرش اعيش برة مصر

اوصف ليا ترتيبات اجمل فرح ممكن تحضره ؟
هنفرض انه فرحى...كتب كتاب فى جامع وقشطة

بتراعى كلام الناس و القيل و القال؟؟؟ لو اه او لو لا قلى ليه؟؟؟
لا خالص

صحيت ملقتش الموبايل و لا الكومبيوتر و لا الكاميرا الديجتال و لقيتنا رجعنا لعصر الحمام الزاجل و الحصنه هتكون سعيد؟؟؟
هى حصلت للحصنة..جولوا عنتر مات

السعاده هى.....؟
ان الواحد يكون علاقته بربنا كويسة..وبعد كده يهيص بقى

عندك امل؟؟؟ اسبابك؟؟؟
عندى امل ودلوقتى عبد الرحمن 4 شهور

لما بتحب تهرب من كل شىء بتروح فين؟؟؟؟

اوضتى

اوضتىامتى اول مره خدت فيها نفس طويل كده و قلت بينك و بين نفسك " ياااه اظاهر ان انا فعلا كبرت" ؟
عيد ميلادى

لما بتعمل عمل خيرى بيكون ايه هو دافعك الاول؟؟؟
ثواب اسعاد الناس

بتشرب سجائر؟؟؟ لو الاجابه اه ايه شعورك لو شفت ست بتشرب سجاير؟؟؟ ليه؟؟؟
الحمدلله عمرى لا شربت سجاير ولا شيشة ولا شميت كولّة

بتعرف ايدك اليمين من الشمال ازاى؟؟؟؟
اليمين ابطش بها والشمال اهرش بها

ايه اكتر آله موسيقيه بتحبها؟؟
بيانو

فى رايك ليه الذوق و النخوه انعدموا؟؟؟؟
ما انعدموش

ايه الحاجه اللى لو حصلتلك تبقى سعيد اوى؟؟؟

اشتغل الشغل اللى بحلم بى

تختار يبقى عندك...ارض زراعيه و لا اجنس عربيات و لا كام عماره و لا فلوس فى البنك؟؟؟؟
فلوس

البحر و لا النيل؟؟؟
البانيو

مركب ولا طيارة ؟
طيارة

مجنون و لا عاقل؟؟
بلاش الطاقية عندى حساسية

نمرر التاج لمين بقي
لكل الناس الحلوة ديا والناس اللى متضافين عندى ع اليمين